Святителю Иоасафу Белгородскому · Тропарь, глас 3
Святи́телю Христу́ Бо́гу возлю́бленне,/ пра́вило ве́ры и о́браз милосе́рдия лю́дем был еси́,/ бде́нием же, посто́м и моли́твою,/ я́ко свети́льник пресве́тлый просия́л еси́,/ и просла́влен от Бо́га яви́лся еси́;/ те́лом у́бо в нетле́нии почива́я,/ ду́хом же престо́лу Бо́жию предстоя́,/ чудеса́ пресла́вно источа́еши./ Моли́ Христа́ Бо́га,// да утверди́т нас в Правосла́вии и благоче́стии/ и спасе́т ду́ши на́ша.
Святителю Иоасафу Белгородскому · Кондак, глас 8
Многоразли́чныя по́двиги жития́ твоего́ кто испове́сть?/ Многообра́зныя ми́лости Бо́жия тобо́ю явле́нныя кто исчислит?/ Дерзнове́ние же твое́ у Пречи́стыя Богоро́дицы и Всеще́драго Бо́га до́бре ве́дуще,/ во умиле́нии серде́чнем зове́м ти:/ не лиши́ и нас твоея́ по́мощи и заступле́ния,// святи́телю Христо́в и чудотво́рче Иоаса́фе.
Мученикам Мине, Ермогену и Евграфу · Тропарь, глас 8
Воздержа́нием страсте́й огнепа́льныя/ умертви́вше зра́ки и движе́ния, Христо́вы му́ченицы,/ прия́ша благода́ть неду́ги отгоня́ти немощны́х,/ и жи́вше и по кончи́не чудоде́йствовати;/ вои́стину чу́до пресла́вно,/ я́ко ко́сти на́ги источа́ют исцеле́ния,// сла́ва Еди́ному и Созда́телю Бо́гу.
Мученикам Мине, Ермогену и Евграфу · Кондак, глас 4
Добропе́сненный глас твои́х слове́с,/ Ермоге́на из глубины́ поги́бели возве́д,/ поста́ви на ка́мени жи́зни,/ отону́дуже и Евгра́ф, царя́ обличи́в,/ ра́дуяся, посека́ется в сла́вную главу́.// Но приле́жно моли́, Ми́но, спасти́ся всем, любо́вию чту́щим тя.
Преподобной Ангелине Сербской · Тропарь, глас 8
В тебе́, ма́ти, изве́стно спасе́ся, е́же по о́бразу,/ прии́мши бо крест, после́довала еси́ Христу́/ и, де́ющи, учи́ла еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней.// Те́мже и со А́нгелы сра́дуется, преподо́бная Ангели́но, дух твой.
Преподобной Ангелине Сербской · Кондак, глас 8
Вы́шняго живота́ жела́ющи сподо́битися,/ ни́жнюю пи́щу тща́тельно оста́вила еси́,/ и бога́тство твое́ расточи́ла еси́ ни́щим,/ и Небе́сное бога́тство прия́ла еси́,/ и по сме́рти нас освяща́еши,/ и чудеса́ твоя́, всехва́льная Ангели́но, источа́еши./ Те́мже твое́ успе́ние свято́е почита́ем, взыва́юще:// ра́дуйся, ма́ти прехва́льная.
Блаженному Иоанну Бранковичу, Сербскому · Тропарь, глас 4
Ди́вен, творя́й пресла́вная чудеса́/ и прославля́яй по кончи́не сла́вящия Тя,/ нетле́нная телеса́ их явля́я/ и чудоде́йствии лю́ди обогаща́я/ во сла́ву свята́го и́мени Своего́,/ дарова́вый нам те́ло уго́дника Своего́ Иоа́нна,// моля́щагося о душа́х на́ших.
Блаженному Иоанну Бранковичу, Сербскому · Кондак, глас 8
Прииди́те, достодо́лжно почти́м Иоа́нна, но́выя благода́ти служи́теля новопросла́вленнаго,/ сла́ву ве́ры на́шея и на́шего моли́твенника,/ созыва́ет бо пе́ти благода́рными гла́сы/ и просла́вити Просла́вльшаго святы́я Своя́/ и мо́лится о творя́щих па́мять его́ и о зову́щих ему́:/ ра́дуйся, Иоа́нне, но́вое процвете́ние.
Преподобноисповеднице Анне (Столяровой) · Тропарь, глас 4
О́браз кро́тости и благоче́стия яви́лася еси́ в земле́ Рязанской свята́я А́нна./ От ю́ности Го́спода возлюби́в,/ пе́нием, бде́нием и моле́нием И́мя свято́е Его́ восхваляла еси́./ Со смире́нием тя́жкия страда́ния в темни́це претерпе́ла еси́,/ вознося́ за все́ благодаре́ние ко Го́споду./ Мы́ же ны́не прославля́ем тя́, свята́я преподобноисповеднице,/ я́ко храни́тельницу свята́го о́браза Пресвяты́я Богоро́дицы «Спору́чница гре́шных»// и ди́вную моли́твенницу о душа́х на́ших.
В среду, св. Кресту · Тропарь, глас 1
Спаси́, Го́споди, лю́ди Твоя́/ и благослови́ достоя́ние Твое́,/ побе́ды на сопроти́вныя да́руя// и Твое́ сохраня́я Кресто́м Твои́м жи́тельство.
В среду, св. Кресту · Кондак, глас 4
Вознесы́йся на Крест во́лею,/ тезоимени́тому Твоему́ но́вому жи́тельству,/ щедро́ты Твоя́ да́руй, Христе́ Бо́же,/ возвесели́ нас си́лою Твое́ю,/ побе́ды дая́ нам на сопоста́ты,/ посо́бие иму́щим Твое́ ору́жие ми́ра,// непобеди́мую побе́ду.