Пророку Софонии · Тропарь, глас 2
Проро́ка Твоего́ Софо́нии па́мять, Го́споди, пра́зднующе,/ тем Тя мо́лим:// спаси́ ду́ши на́ша.
Пророку Софонии · Кондак, глас 4
Яви́лся еси́ светоза́рен Боже́ственным Ду́хом, проро́че Софо́ние,/ Бо́жие явле́ние возгласи́в:/ ра́дуйся зело́, дщи Сио́ня Иерусали́мова, пропове́ждь:// се Царь твой гряде́т, спаса́яй.
Преподобному Савве, игумену Сторожевскому, Звенигородскому · Тропарь, глас 8
Пусты́ни яви́лся еси́ до́брое прозябе́ние, преподо́бне:/ от ю́ности бо изво́лил еси́ чи́стое житие́,/ духо́вному твоему́ учи́телю после́дуя,/ и того́ уче́нием ум к Небе́сным впери́в,/ и ста́ду твоему́ прему́др наста́вник показа́лся еси́,/ тем и Христо́с, я́ко пресве́тла тя свети́льника, чудесы́ обогати́,// Са́вво, о́тче наш, моли́ спасти́ся душа́м на́шим.
Преподобному Савве, игумену Сторожевскому, Звенигородскому · Кондак, глас 2
Госпо́дним жела́нием распали́вся,/ стра́сти плотски́я воздержа́нием оттря́с,/ Боже́ственнаго све́та незаходи́мое свети́ло яви́лся еси́,/ чуде́с луча́ми всех просвеща́еши,/ притека́ющих к ра́це моще́й твои́х,// Са́вво, преподо́бне о́тче наш.
Преподобному Феодулу Цареградскому · Тропарь, глас 8
В тебе́, о́тче, изве́стно спасе́ся, е́же по о́бразу,/ прии́м бо крест, после́довал еси́ Христу́/ и, де́я, учи́л еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней.// Те́мже и со А́нгелы сра́дуется, преподо́бне Феоду́ле, дух твой.
Преподобному Феодулу Цареградскому · Кондак, глас 2
Царя́ тле́ннаго и скороги́бнущия сла́вы,/ му́дре о́тче, измени́л еси́ ве́чно пребыва́ющими,/ от сто́лпнаго же и приско́рбнаго жития́ в Го́рнее и всера́достное взы́де,/ превели́чества сла́вы Небе́сному Царю́ сца́рствуя, Феоду́ле,// моли́ непреста́нно о всех нас.
Святому Георгию Романово-Борисоглебскому, исповеднику · Тропарь
Основа́вый житие́ свое́ на ка́мени ве́ры, испове́дниче свя́те Гео́ргие, устоя́л еси́ во дни лю́таго искуше́ния, положи́л еси́ ду́шу за Це́рковь, за дру́ги своя́, послужи́л еси́ многострада́льному святи́телю Афана́сию, с ни́мже предстои́ши ны́не Престо́лу Бо́жию, Христа́ Спа́са моля́ о спасе́нии душ на́ших.
Святому Георгию Романово-Борисоглебскому, исповеднику · Кондак, глас 4
Днесь ра́дуется сла́вная земля́ Яросла́вская, обре́тши святы́я мо́щи твоя́, испове́дниче свя́те Гео́ргие. Лжепа́стырем пре́данный вла́сти богобо́рней, у́зами и лише́ньми искуше́н быв, простото́ю и тве́рдостию мудрова́ния лука́вая отве́ргл еси́. Послужи́вый Це́ркви стра́ждущей, гони́мым ча́дам ея́, кти́торским служе́нием свои́м хра́мы Бо́жия укра́сил еси́. Яви́лся еси́ сла́ва Це́ркве, о не́йже непреста́нно моли́, да непоколеби́му утверди́т ю́ Христо́с.
В среду, св. Кресту · Тропарь, глас 1
Спаси́, Го́споди, лю́ди Твоя́/ и благослови́ достоя́ние Твое́,/ побе́ды на сопроти́вныя да́руя// и Твое́ сохраня́я Кресто́м Твои́м жи́тельство.
В среду, св. Кресту · Кондак, глас 4
Вознесы́йся на Крест во́лею,/ тезоимени́тому Твоему́ но́вому жи́тельству,/ щедро́ты Твоя́ да́руй, Христе́ Бо́же,/ возвесели́ нас си́лою Твое́ю,/ побе́ды дая́ нам на сопоста́ты,/ посо́бие иму́щим Твое́ ору́жие ми́ра,// непобеди́мую побе́ду.