Мученикам в Мелитине пострадавшим · Тропарь, глас 4
Му́ченицы Твои́, Го́споди,/ во страда́ниих свои́х венцы́ прия́ша нетле́нныя от Тебе́, Бо́га на́шего:/ иму́ще бо кре́пость Твою́,/ мучи́телей низложи́ша,/ сокруши́ша и де́монов немощны́я де́рзости./ Тех моли́твами// спаси́ ду́ши на́ша.
Мученикам в Мелитине пострадавшим · Кондак, глас 8
Ли́к му́ченический я́сен, по́лк светоно́сен, соше́д к на́м разу́мно, Це́рковь дне́сь просвети́л е́сть чу́дными заря́ми. Те́мже, пра́зднующе честну́ю па́мять и́х, про́сим от Тебе́, Спа́се на́ш: те́х моли́твами от бе́д изба́ви на́с, да пое́м Ти́: аллилу́ия.
Преподобному Лазарю Галисийскому · Тропарь, глас 8
Бде́нными моли́твами,/ тече́ньми сле́зными столп омочи́л еси́,/ и из глубины́ воздыха́ньми/ во сто трудо́в уплодоноси́л еси́,/ и был еси́ па́стырь, всем подая́ проще́ние,/ преподо́бне о́тче наш Ла́заре:/ моли́ся Христу́ Бо́гу// спасти́ся душа́м на́шим.
Преподобному Лазарю Галисийскому · Кондак, глас 4
Я́ко свети́льника превели́каго/ Це́рковь Христо́ва сла́вит тя с весе́лием псало́мски./ Те́мже не преста́й моля́ся Христу́// да́ти всем прегреше́ний проще́ние.
Преподобному Кириллу Новоезерскому (Новгородскому) чудотворцу · Тропарь, глас 8
Бо́жиим Ду́хом подвиза́емь,/ слез твои́х ту́чами изсо́хшее напои́л еси́,/ и безпло́тное в пусты́ни житие́ показа́л еси́,/ и е́же из глубины́ се́рдца бо́дренными моли́твами и посто́м/ благодея́ния труды́ уплодоноси́л еси́,/ и вселе́нную всю просвети́л еси́ сия́нием чуде́с твои́х,/ о́тче наш Кири́лле.// Моли́ Христа́ Бо́га, спасти́ся душа́м на́шим.
Преподобному Кириллу Новоезерскому (Новгородскому) чудотворцу · Кондак, глас 8
Взбра́нному и кре́пкому адама́нту,/ прогони́телю бесо́в, но́вому чудотво́рцу/ победи́тельная, страсте́й злых свободи́вшеся,/ благода́рственная воспису́ем ти, о́тче наш Кири́лле./ Но я́ко име́я дерзнове́ние у Престо́ла Христо́ва,/ ве́рою чту́щих тя, град же и лю́ди, моли́твою твое́ю сохраня́й,// ты бо еси́ ста́ду твоему́ похвала́ и утвержде́ние.
Преподобному Кириллу Новоезерскому (Новгородскому) на обретение мощей · Тропарь, глас 8
Я́ко свети́льник яви́лся еси́ всесве́тел/ во ото́це Но́ва е́зера на Кра́сном о́строве,/ преподо́бне о́тче Кири́лле,/ ты бо крест Христо́в на ра́мо взем,/ усе́рдно Тому́ после́довал еси́,/ чистото́ю Бо́гови прибли́жився,/ от Него́же и си́лами чуде́с обогати́ся,/ тем и мы любе́зно прибега́ем к ра́це честны́х моще́й твои́х, уми́льно глаго́лем:/ о, преподо́бне о́тче Кири́лле!// моли́ Христа́ Бо́га спасти́ся душа́м на́шим.
Преподобному Кириллу Новоезерскому (Новгородскому) на обретение мощей · Кондак, глас 2
Христо́в яре́м на ра́мо взе́м,/ усе́рдно Тому́ после́дова,/ чистото́ю Бо́гови прибли́жився,/ о́тче преподо́бне Кири́лле,/ мо́лим тя́, посеща́й ми́лостивно ча́д свои́х,/ и моли́ непреста́нно о все́х на́с.
Мученику Феодоту Анкирскому и иже с ним · Тропарь, глас 4
Му́ченик Твой, Го́споди, Феодо́т/ во страда́нии свое́м вене́ц прия́т нетле́нный от Тебе́, Бо́га на́шего:/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами// спаси́ ду́ши на́ша.
Мученику Феодоту Анкирскому и иже с ним · Кондак, глас 2
Страда́льчески подвиза́вся до́бре, со сострада́льцы твои́ми, Феодо́те,/ и венцы́ по́чести прия́сте с честны́ми страстоте́рпицами де́вами.// Те́мже Христа́ Бо́га моли́те непреста́нно о всех нас.
Мученикам Авкту и Тавриону · Тропарь, глас 4
Таврио́н сла́вный и Авкт ди́вный,/ о́гневи проти́вистася и всем и́нем ка́знем,/ моли́твами возмога́юща;/ та у́бо моле́нием сердца́ похваля́юще,/ ве́рою пресвяту́ю и честну́ю па́мять е́ю соверши́м,// ду́шам просвеще́ние почерпа́юща.
Священномученику Кириллу (Смирнову), епископу Казанскому · Тропарь, глас 3
Вели́ка в ско́рбех уте́шителя/ обре́те тя Це́рковь Ру́сская, свя́те Кири́лле,/ ты бо, в годи́ну гоне́ния ча́шу страда́ний прие́м,/ жа́ждущия пра́вды воеди́но собра́л еси́,/ я́ко оре́л небе́сный под криле́ птенцы́ своя́,/ и вся научи́л еси́/ ве́ры до́брому испове́данию./ Те́мже в ли́це но́вых му́ченик/ Престо́лу Бо́жию предстои́ши, // моля́ся о чту́щих любо́вию па́мять твою́.
Священномученику Кириллу (Смирнову), епископу Казанскому · Кондак, глас 5
Лучеза́рною твое́ю благода́тию нас просвети́,/ пою́щих му́жества твоего́ кре́пость,/ я́же вои́телем тьмы бе непристу́пна,/ и моли́твами твои́ми Це́рковь Ру́сскую в единомы́слии утверди́/ и от бед оте́чество на́ше огради́, // святи́телю Кири́лле, му́чениче сла́вный.
Священномученику Сергию (Звереву), архиепископу Елецкому · Тропарь, глас 4
Цвет благоуханный жития священнаго/ и плод преизрядный страдальчества/ Церкви Русской даровался еси,/ святителю Сергие блаженне,/ новомучеников сопричастник быв/ и святителей сопрестольник,/ моли Христа Бога спастися душам нашим.
Священномученику Сергию (Звереву), архиепископу Елецкому · Кондак, глас 8
Аще и повержено бысть честное тело твое/ без вести среде степи Карагандинския,/ но в лице новомучеников русских нам явлен был еси,/ священномучениче славне Сергие:/ с нимиже озаряеши концы Отечества нашего,/ прося нам мира и велия милости.
Священномученику Константину Богородскому (Голубеву) · Тропарь, глас 4
Свяще́нником украше́ние и му́чеником похвала́/ яви́лся еси́, о́тче Константи́не,/ ты бо, мно́гия лю́ди во огра́ду Це́ркве возврати́л еси́/ и небоя́зненно страда́ния и смерть за Христа́ прия́л еси́./ Ны́не же моли́ Человеколю́бца Бо́га/ Це́рковь Ру́сскую от ересе́й и раско́лов сохрани́ти// и спасти́ся душа́м на́шим.
Священномученику Константину Богородскому (Голубеву) · Кондак, глас 5
Ре́вностию о ве́ре Христо́ве от ю́ности возгоре́вся,/ богому́дре о́тче Константи́не,/ за́поведем ева́нгельским после́довал еси́/ и свети́льник ве́ры заблу́ждшим яви́лся еси́./ Те́мже, страда́нием за Христа́ жизнь твою́ увенча́в,/ Бо́га в по́двизе просла́вил еси́,// Его́же моли́ спасти́ся душа́м на́шим.
Новомученикам Богородским · Тропарь, глас 4
Христа́ Спа́са ве́рнии ученицы́,/ Це́ркве Ру́сския блаже́нная ча́да,/ святи́и новому́ченицы Богоро́дстии,/ вы, ве́ру правосла́вную тве́рдо испове́давше,/ стезе́ю кре́стною к Небе́сному гра́ду востекли́ есте́./ Те́мже я́ко те́плии хода́таи на́ши,// при́сно моли́теся ко Го́споду спасти́ся душа́м на́шим.
Новомученикам Богородским · Кондак, глас 5
Ча́да ве́рная Це́ркве Ру́сския,/ муче́ний и сме́рти не убоя́вшеся,/ за Христа́ страда́ния прия́ли есте́,/ и зе́млю Богоро́дскую кровьми́ свои́ми освяти́ли есте́./ Ны́не же у Престо́ла Бо́жия веселя́щеся,/ о земне́м оте́честве ва́шем непреста́нно моли́теся,/ ве́ру и благоче́стие в нем укрепи́ти// и нам победи́тельми греха́ яви́тися.
В пятницу, св. Кресту · Тропарь, глас 1
Спаси́, Го́споди, лю́ди Твоя́/ и благослови́ достоя́ние Твое́,/ побе́ды на сопроти́вныя да́руя// и Твое́ сохраня́я Кресто́м Твои́м жи́тельство.
В пятницу, св. Кресту · Кондак, глас 4
Вознесы́йся на Крест во́лею,/ тезоимени́тому Твоему́ но́вому жи́тельству,/ щедро́ты Твоя́ да́руй, Христе́ Бо́же,/ возвесели́ нас си́лою Твое́ю,/ побе́ды дая́ нам на сопоста́ты,/ посо́бие иму́щим Твое́ ору́жие ми́ра,// непобеди́мую побе́ду.