Воскресные · Тропарь, глас 4
Све́тлую воскресе́ния про́поведь/ от А́нгела уве́девша Госпо́дни учени́цы/ и пра́деднее осужде́ние отве́ргша,/ апо́столом хва́лящася глаго́лаху:/ испрове́ржеся сме́рть,/ воскре́се Христо́с Бо́г,// да́руяй ми́рови ве́лию ми́лость.
Воскресные · Кондак, глас 4
Спа́с и Изба́витель мо́й/ из гро́ба, я́ко Бо́г,/ воскреси́ от у́з земноро́дныя,/ и врата́ а́дова сокруши́,// и я́ко Влады́ка воскре́се тридне́вен.
Святым отцам VII Вселенского Собора · Тропарь, глас 8
Препросла́влен еси́, Христе́ Бо́же наш,/ свети́ла на земли́ отцы́ на́ши основа́вый,/ и те́ми ко и́стинней ве́ре вся ны наста́вивый,// Многоблагоутро́бне, сла́ва Тебе́.
Святым отцам VII Вселенского Собора · Кондак, глас 6
И́же из Отца́ возсия́в Сын неизрече́нно,/ из Жены́ роди́ся сугу́б естество́м,/ Его́же ви́дяще, не отмета́емся зра́ка изображе́ния,/ но сие́ благоче́стно начерта́юще, почита́ем ве́рно./ И сего́ ра́ди и́стинную ве́ру Це́рковь держа́щи,// лобыза́ет ико́ну вочелове́чения Христо́ва.
Мученикам Прову, Тараху и Андронику Аназарвским · Тропарь, глас 5
Святы́х му́ченик исправле́нием/ Небе́сныя си́лы преудиви́шася,/ я́ко в те́ле сме́ртнем,/ безтеле́снаго врага́ си́лою Креста́,/ подвиза́вшеся до́бре, победи́ша неви́димо./ И мо́лятся Го́споду// поми́ловатися душа́м на́шим.
Мученикам Прову, Тараху и Андронику Аназарвским · Кондак, глас 2
Тро́ицы на́м сла́ву яви́ша,/ до́блии Христо́вы ору́жницы и му́ченицы,/ с Тара́хом Про́в же и Андрони́к:/ обличи́ша бо все́ мучи́телей безбо́жие,// ве́рою до́блественне страда́льчествовавше.
Преподобному Косме, епископу Маиумскому, творцу канонов · Тропарь, глас 8
Правосла́вия наста́вниче,/ благоче́стия учи́телю и чистоты́,/ вселе́нныя свети́льниче,/ архиере́ев Богодухнове́нное удобре́ние,/ Космо́ прему́дре,/ уче́ньми твои́ми вся просвети́л еси́, цевни́це духо́вная,// моли́ Христа́ Бо́га спасти́ся душа́м на́шим.
Преподобному Косме, епископу Маиумскому, творцу канонов · Кондак, глас 8
Укра́шен доброде́тельми, Космо́ Богодухнове́нне,/ Це́ркве Христо́вы украше́ние был еси́:/ пе́сньми бо украси́л еси́ сию́, блаже́нне./ Но моли́ся ко Го́споду изба́витися нам от вся́ких ко́зней ра́тника,/ тебе́ зову́щим:// ра́дуйся, о́тче требога́те.
На перенесение из Мальты в Гатчину десной руки Иоанна Предтечи · Тропарь, глас 4
От за́пада возсия́вши Предте́чева рука́,/ лучи́ испуща́ет нетле́ния ве́рным исцеле́ний,/ свы́ше собира́ет мно́жество А́нгел,/ до́ле же созыва́ет челове́ческий род,// единогла́сно возсыла́ти сла́ву Христу́ Бо́гу.
На перенесение из Мальты в Гатчину десной руки Иоанна Предтечи · Кондак, глас 6
У́мнаго Со́лнца свети́льник Боже́ственный Предте́ча,/ показа́вый в конце́х светоно́сную свою́ десни́цу,/ ны́не на се́вере озаря́ет е́ю блаже́нное Оте́чество на́ше,/ просвеща́я и освяща́я ве́рно покланя́ющихся, и Христу́ вопию́щих:// спаси́ нас моли́твами проро́ка Твоего́, Царю́ Вы́шний.
Преподобномученику Лаврентию Оптинскому · Тропарь, глас 4
Сла́вою богоуго́дных по́двигов твои́х/ днесь страна́ Калу́жская хва́лится,/ и О́птина пу́стынь па́мять твою́ све́тло пра́зднует,/ преподобному́чениче Лавре́нтие блаже́нне,/ яви́лся бо еси́ ве́ры кре́пкий адама́нт/ и освяти́л еси́ зе́млю на́шу кро́вию твое́ю,// те́мже моли́ Христа́ Бо́га спасти́ся душа́м на́шим.
Преподобномученику Лаврентию Оптинскому · Кондак, глас 8
Зе́млю Калу́жскую обте́кл еси́,/ богому́дре Лавре́нтие,/ благоуха́нием Христо́вым сию́ облагоуха́я/ и сло́вом Бо́жиим ча́да твоя́ пита́я;/ те́мже и ны́не не пре́зри зову́щия ти:// ра́дуйся, му́чениче пресла́вне.
Священноисповеднику Николаю (Могилевскому), митрополиту Алма-Атинскому · Тропарь, глас 7
Я́ко светоза́рное свети́ло,/ луча́ми Боже́ственных дарова́ний сия́ющее,/ яви́ тя́ Со́лнце Пра́вды Христо́с Бо́г на́ш,/ тьму́ безбо́жия и злонра́вия дале́че отгоня́юща,/ и заря́ми богопозна́ния осия́юща вопию́щих ве́рно:/ Ра́дуйся, свя́те Нико́лае,// Христо́в испове́дниче и Казахстанский чудотво́рче.
Священноисповеднику Николаю (Могилевскому), митрополиту Алма-Атинскому · Кондак, глас 8
Избра́нный от Предве́чнаго Архиере́я и Це́ркви Зижди́теля,/ да́нный Казахстану хода́таю изря́дный и засту́пниче пречу́дный, святи́телю Нико́лае,/ ублажа́я по́двиги и труды́ твоя́,/ любве́ ра́ди Го́спода тобо́ю подъя́тыя,/ восхваля́ем ди́внаго во святы́х Свои́х Бо́га на́шего,/ да́вшаго тебе́ благода́ть вели́чия Своего́/ и научи́вшаго на́с любо́вию пе́ти тебе́:/ Ра́дуйся, свя́те Нико́лае,// Христо́в испове́дниче и Казахстанский чудотво́рче.
Пресвятой Богородице пред иконой Ея «Иерусалимской» · Тропарь, глас 4
Богора́дованная Влады́чице,/ препросла́вленная Ма́ти Щедро́т и человеколю́бия,/ всеми́лостивая о всем ми́ре Хода́таице!/ Приле́жно раби́ Твои́ ко Твоему́ предста́тельству прибега́ем,/ и ко пречу́дному о́бразу Твоему́ со умиле́нием припа́дающе мо́лимся:/ моли́тву те́плую Сы́ну Твоему́ и Бо́гу на́шему сотвори́,/ о Всепе́тая Цари́це Богоро́дице,/ да от вся́ких боле́зней и печа́лей нас Тебе́ ра́ди изба́вит,/ и от грехо́в вся́ких свободи́в,/ Ца́рствия Своего́ Небе́снаго насле́дники ны пока́жет:/ ве́лие бо и неизрече́нное я́ко Ма́ти к Нему́ дерзнове́ние и́маши,/ и вся от Него́ испроси́ти мо́жеши,// Еди́на во ве́ки преблагослове́нная.
Пресвятой Богородице пред иконой Ея «Иерусалимской» · Кондак, глас 5
Не отри́ни, о Милосе́рдая Ма́ти,/ слез и воздыха́ний на́ших,/ но проше́ния на́ша ми́лостивно прии́мши,/ пред Иерусали́мскою ико́ною Твое́ю/ моля́щихся люде́й ве́ру укрепи́,/ умиле́нием сердца́ их испо́лни,/ и крест земна́го жития́ нести́ им помози́,// ели́ка бо хо́щеши мо́жеши.
Пресвятой Богородице пред иконой Ея «Рудненской» · Тропарь, глас 4
К Богоро́дице приле́жно ны́не притеце́м,/ грешни́и и смире́ннии, и припаде́м,/ в покая́нии зову́ще из глубины́ души́:/ Влады́чице, помози́, на ны милосе́рдовавши,/ потщи́ся, погиба́ем от мно́жества прегреше́ний,/ не отврати́ Твоя́ рабы́ тщи:// Тя бо и еди́ну наде́жду и́мамы.
Пресвятой Богородице пред иконой Ея «Рудненской» · Кондак, глас 6
Не и́мамы ины́я по́мощи,/ не и́мамы ины́я наде́жды,/ ра́зве Тебе́, Влады́чице,/ Ты нам помози́:/ на Тебе́ наде́емся/ и Тобо́ю хва́лимся,/ Твои́ бо есмы́ раби́,// да не постыди́мся.
Пресвятой Богородице пред иконой Ея «Калужской» · Тропарь, глас 4
Засту́пнице от враг иноплеме́нных Необори́мая Калу́жския земли́/ и Изба́вительнице от смертоно́сныя я́звы Ми́лостивая!/ Изба́ви рабы́ Твоя́ от вся́ких бед и боле́зней,/ с ве́рою и любо́вию прибега́ющия к чудотво́рней ико́не Твое́й,// и спаси́ ду́ши на́ша.
Пресвятой Богородице пред иконой Ея «Калужской» · Кондак, глас 6
Не и́мамы пе́сней, ниже́ слове́с,/ ка́ко досто́йно восхваля́ти Тя,/ Ма́ти Христа́ Бо́га на́шего,/ явле́ния ра́ди чудотво́рныя ико́ны Твоея́ земли́ Калу́жстей,/ то́кмо мо́жем вопи́ти Тебе́:/ не отврати́ ми́лости Твоея́ от нас// и низпосли́ ю́ всем притека́ющим к цельбоно́сней ико́не Твое́й.