Воскресные · Тропарь, глас 3
Да веселя́тся небе́сная,/ да ра́дуются земна́я,/ я́ко сотвори́ держа́ву/ мы́шцею Свое́ю Госпо́дь,/ попра́ сме́ртию сме́рть,/ пе́рвенец ме́ртвых бы́сть;/ из чре́ва а́дова изба́ви на́с,// и подаде́ ми́рови ве́лию ми́лость.
Воскресные · Кондак, глас 3
Воскре́сл еси́ дне́сь из гро́ба, Ще́дре,/ и на́с возве́л еси́ от вра́т сме́ртных;/ дне́сь Ада́м лику́ет, и ра́дуется Е́ва,/ вку́пе же и проро́цы с патриа́рхи воспева́ют непреста́нно// Боже́ственную держа́ву вла́сти Твоея́.
Мученице Харитине Амисийской · Тропарь, глас 4
А́гница Твоя́, Иису́се, Харити́на/ зове́т ве́лиим гла́сом:/ Тебе́, Женише́ мой, люблю́/ и, Тебе́ и́щущи, страда́льчествую,/ и сраспина́юся, и спогреба́юся креще́нию Твоему́,/ и стражду́ Тебе́ ра́ди, я́ко да ца́рствую в Тебе́,/ и умира́ю за Тя, да и живу́ с Тобо́ю;/ но, я́ко же́ртву непоро́чную, приими́ мя с любо́вию, поже́ршуюся Тебе́./ Тоя́ моли́твами,// я́ко Ми́лостив, спаси́ ду́ши на́ша.
Мученице Харитине Амисийской · Кондак, глас 2
Кре́пким ра́зумом, Харити́но,/ ду́шу утве́рждши ве́рою,/ бори́теля врага́ я́ве посрами́ла еси́,/ у Христа́ предста́, всеблаже́нная,/ червлени́цу от крове́й твои́х нося́щи,/ и при́сно со А́нгелы ра́дуешися,// моли́ за ны, страстоте́рпице.
Святителям Московским · Тропарь, глас 4
Первопресто́льницы Росси́йстии,/ и́стиннии храни́телие апо́стольских преда́ний,/ столпи́ непоколеби́мии, правосла́вия наста́вницы,/ Пе́тре, Алекси́е, Ио́но, Фили́ппе и Ермоге́не,/ Влады́ку всех моли́те/ мир вселе́нней дарова́ти,// и душа́м на́шим ве́лию ми́лость.
Святителям Московским · Кондак, глас 3
Во святи́телех благоче́стно пожи́сте,/ и лю́ди к Богоразу́мию наста́висте, и до́бре Бо́гу угоди́сте,/ сего́ ра́ди от Него́ нетле́нием и чудесы́ просла́вистеся,// я́ко ученицы́ Бо́жия благода́ти.
Дамиану пресвитеру, целебнику, Иеремии и Матфею прозорливым, Печерским, в Ближних пещерах · Тропарь, глас 1
Христо́вых повеле́ний све́том сердца́ своя́ просвети́вше,/ стра́стный мрак прогна́сте,/ те́мже Тро́ицы селе́ние бы́сте тричи́сленнии отцы́,/ Дамиа́не, Иереми́е с Матфе́ем,/ от Нея́же благода́ть прие́мше,/ неду́жныя исцеля́ете, бу́дущая возвеща́ете/ и, А́нгелом соприча́стницы су́ще,// моли́теся Христу́ Бо́гу дарова́ти нам прича́стие святы́х.
Дамиану пресвитеру, целебнику, Иеремии и Матфею прозорливым, Печерским, в Ближних пещерах · Кондак, глас 2
Я́коже дре́внии проро́цы благода́ть проро́чествия прие́мше/ и нело́жне ду́хом предзре́вше, прореко́ша наити́ хотя́щая,/ та́ко и вы в жи́зни на́шей зла́я, грехо́в ра́ди на́ших на ны гряду́щая, предвозвести́сте;/ и ны́не да не пости́гнут ны зла́я,// испроси́те от Христа́ Бо́га исправле́ние дело́м на́шим и ве́лию ми́лость.
Преподобной Харитине Литовской, Новгородской · Тропарь, глас 2
От ю́ности твоея́ Бо́га все́м се́рдцем возлюби́ла еси́, Харити́но преподо́бная, по́двиги в ве́ре положи́ла еси́ за Христа́, Жениха́ твоего́, и в но́вое твое́ Оте́чество, зе́млю ру́сскую вселилася еси́, к Небе́сному Оте́честву на́с призыва́еши, моля́щи Христа́ Бо́га спасти́ся душа́м на́шим.
Преподобной Харитине Литовской, Новгородской · Кондак, глас 4
Оте́чество твое́ и ро́д оста́вив, Вели́каго Нова́града дости́гла еси́, во оби́тели и́ноческой многотру́дный по́двиг преподо́бнический подъя́ла еси́, а́нгельски на земли́ пожи́вши, мно́гим жена́м русским пу́ть ко спасе́нию показа́. Те́мже вси́ притека́юще к тебе́, зове́м: ра́дуйся, преподо́бная ма́ти на́ша Харити́но.
Преподобноисповеднику Гавриилу (Игошкину), архимандриту Мелекесскому · Тропарь, глас 3
Вельми́ све́тел яви́ся на́м по́двиг жития́ твоего́,/ испове́дниче Христо́в Гаврии́ле,/ любве́ ра́ди ко Го́споду изше́л еси́ с ра́достию на ско́рбь и лише́ния,/ кре́ст сво́й нося́й/ и та́ко о́браз терпе́ния показу́яй,/ ве́рныя в годи́ну озлобле́ния/ па́стырски в ве́ре соблю́л еси́,/ дерзнове́нием благода́ть Свята́го Ду́ха стяжа́в,/ те́мже у́бо вопие́м ти́:// моли́твами твои́ми спаси́ души́ на́ша.
Преподобноисповеднику Гавриилу (Игошкину), архимандриту Мелекесскому · Кондак, глас 2
Кре́пости Бо́жия соименник/ и прича́стник Бо́жия благода́ти яви́лся еси́,/ о́тче Гаврии́ле,/ преподо́бием и испове́дничеством/ и́стину Правосла́вныя ве́ры утвержда́яй,/ и́го Христо́во до конца́ восприя́л еси́,/ те́мже и просла́влен еси́ со святы́ми,// моли́ Христа́ Бо́га спасти́ся душа́м на́шим.