Воскресные · Тропарь, глас 8
С высоты́ снизше́л еси́, Благоутро́бне,/ погребе́ние прия́л еси́ тридне́вное,/ да на́с свободи́ши страсте́й,// Животе́ и воскресе́ние на́ше. Го́споди, сла́ва Тебе́.
Преподобномученице Евдокии Илиопольской · Тропарь, глас 8
Пра́востию у́мною ду́шу твою́ привяза́вши в любо́вь Христо́ву,/ тле́нных, и кра́сных, и вре́менных забы́тием претекла́ еси́,/ я́ко Сло́ва учени́ца:/ поще́нием стра́сти пе́рвее умертви́вши,/ страда́льчески второ́е врага́ посрами́ла еси́./ Тем Христо́с сугу́бых венца́ сподо́би тя,/ сла́вная Евдоки́е, преподо́бная страстоте́рпице,// моли́ Христа́ Бо́га спасти́ся душа́м на́шим.
Преподобномученице Евдокии Илиопольской · Кондак, глас 4
Во страда́нии твое́м до́бре подвиза́вшися,/ и по сме́рти нас освяща́еши чуде́с изли́янии, всехва́льная,/ ве́рою прибега́ющия в Боже́ственную це́рковь твою́,/ и торжеству́юще, мо́лим тя, преподо́бная му́ченице Евдоки́е:// да изба́вимся неду́г душе́вных и чуде́с благода́ть почерпе́м.
Преподобному Мартирию Зеленецкому · Тропарь, глас 2
От ю́ности, Богоблаже́нне, Христа́ возлюби́в,/ оте́чество оста́вил еси́/ и, всех мирски́х мяте́жей уклони́вся,/ в ти́хое приста́нище пречестны́я оби́тели Богома́терни дости́гл еси́;/ отню́дуже уве́дев непрохо́дную пусты́ню,/ крестови́дною заре́ю пока́занную,/ жела́тельне ю́ обре́л еси́,/ и, в ней всели́вся,/ и́ночествующих собра́л еси́,/ и сих уче́ньми свои́ми, я́ко ле́ствицею восхо́дною на Не́бо,/ трудолю́бно тща́лся еси́ возводи́ти к Бо́гу,/ Ему́же моли́ся, Богому́дре Марти́рие,// дарова́ти душа́м на́шим ве́лию ми́лость.
Преподобному Мартирию Зеленецкому · Кондак, глас 8
Оте́чества, преподо́бне, и всего́ мирска́го мяте́жа уклони́тися возжеле́л еси́,/ и, в пусты́ню всели́вся,/ та́мо во блаже́ннем безмо́лвии жесто́кое житие́ показа́л еси́,/ и ча́да послуша́ния и смире́ния в нем возрасти́л еси́./ Сего́ ра́ди, дерзнове́ние стяжа́в ко Святе́й Тро́ице,/ е́же моли́тися, Богоблаже́нне, о нас, ча́дех свои́х, и́хже собра́л еси́,/ и о всех правове́рных, да зове́м ти:// ра́дуйся, о́тче Марти́рие, безмо́лвия пусты́ннаго люби́тель.
Преподобномученице Дарии Зайцевой · Тропарь, глас 4
А́гница Твоя́, Иису́се, и кро́ткая голуби́ца Да́рия,/ я́ко заколе́ние непоро́чно и приноше́ние чи́сто,/ любо́вию прине́сшися в же́ртву Тебе́,/ сочета́ся преподо́бных светле́йшему ли́ку/ и му́чеников до́блестному полку́./ Тоя́ моли́твами, Христе́ Бо́же,// я́ко Ми́лостив, спаси́ ду́ши на́ша.
Преподобномученице Дарии Зайцевой · Кондак, глас 8
Доброде́тели и́ноческия стяжа́вши,/ благоче́стием и любо́вию себе́ украси́ла еси́,/ мук же и сме́рти не убоя́вшися,/ те́ло свое́ не пощади́ла еси́./ Те́мже, ве́рою тьму безбо́жия посрами́вши,/ насле́дница Ца́рствия Христо́ва яви́лася еси́./ Сего́ ра́ди с любо́вию зове́м ти:// ра́дуйся, Да́рие преподобному́ченице, в духо́вней бра́ни нас укрепля́ющая.
Преподобномученицам Анне и Матроне (Макандиным), Алексиевским · Тропарь, глас 5
Христа́ Го́спода Иису́са ве́рныя учени́цы,/ Це́ркве Ру́сския избра́нныя а́гницы,/ оби́тели Алекси́евския сла́во и украше́ние,/ преподо́бныя страстоте́рпицы А́нно и Матро́но,/ ле́гкое и́го и я́звы Его́ любо́вию нося́ще,/ ле́ствицею муче́ний к Нему́, я́ко Небе́сному Жениху́, востекли́ есте́,/ Его́же моли́те сохрани́ти в благоче́стии лю́ди земли́ Ру́сския// и спасти́ ду́ши на́ша.
Преподобномученицам Анне и Матроне (Макандиным), Алексиевским · Кондак, глас 4
Я́ко кри́ни багрянови́днии,/ посреде́ те́рний безбо́жия/ в земне́м Оте́честве ва́шем процвели́ есте́,/ преподобному́ченицы А́нно и Матро́но честны́я,/ по́двиги воздержа́ния страда́нием украси́вшя,/ востекли́ есте́ к Небе́сному Жениху́ Христу́,// И́же увенча́ вы красото́ю сла́вы нетле́нныя.
Недели сыропустной · Кондак, глас 6
Прему́дрости Наста́вниче, смы́сла Пода́телю,/ нему́дрых Наказа́телю, и ни́щих Защи́тителю,/ утверди́, вразуми́ се́рдце мое́, Влады́ко!/ Ты даждь ми сло́во, О́тчее Сло́во,/ се бо устне́ мои́ не возбраню́,/ во е́же зва́ти Тебе́:// Ми́лостиве, поми́луй мя па́дшаго.