Пророку Аввакуму · Тропарь, глас 2
Проро́ка Твоего́ Авваку́ма па́мять, Го́споди, пра́зднующе,/ тем Тя мо́лим:// спаси́ ду́ши на́ша.
Пророку Аввакуму · Кондак, глас 8
Возгласи́вый вселе́нней от ю́га прише́ствие Бо́жие от Де́вы, Авваку́ме богоглаго́ливе,/ и на Боже́ственней стра́жи предстоя́нием/ слы́шания от светоно́сна а́нгела/ Христо́во Воскресе́ние возвести́л еси́ ми́ру,/ сего́ ра́ди ве́село зове́м ти:// ра́дуйся, проро́ков све́тлая добро́то.
Преподобному Афанасию, затворнику Печерскому, в Дальних пещерах · Тропарь, глас 7
По и́мени своему́ за труды́ ве́лия/ и всегда́шнее зде умерщвле́ние пло́ти в затво́ре,/ безсме́ртную ны́не на Небеси́/ жизнь насле́довавый,/ мо́лим тя приле́жно:/ моли́ся о нас,// я́ко да и мы тоя́жде сподо́бимся получи́ти.
Преподобному Афанасию, затворнику Печерскому, в Дальних пещерах · Кондак, глас 1
Ве́дый ми́ра сего́ суету́ бы́ти тще́тну,/ отврати́лся еси́ ея́,/ не ктому́ сами́ма очи́ма,/ но и всего́ себе́ всеконе́чне, преподо́бне, отврати́в,/ затвори́лся еси́ в те́мней пеще́ре,/ в не́йже в моли́твах и слеза́х многовре́менне потру́ждся/ и обре́т на Небеси́ безконе́чную радость,// моли́ся непреста́нно за ду́ши на́ша.
Мученице Миропии Хиосской · Тропарь, глас 1
Доброму́ченице Миропи́е и Христа́ неве́сто нетле́нная,/ ны́не Ему́же предстои́ши, прекра́сная,/ ра́ны нося́щи пло́ти,/ я́ко ка́мни све́тлы и светообра́зны,/ и в крова́вую порфи́ру, я́ко цари́ца, облече́нная, пресла́вная,/ умоли́ Его́ за ны,/ я́же с любо́вию восхваля́ющия// хвалы́ побе́дными и пе́сньми твою́ Боже́ственную страсть.
Мученице Миропии Хиосской · Кондак, глас 3
По и́мени, о, страстоте́рпице Миропи́е,/ ми́ро источа́еши благода́ти чуде́с/ и пасе́ши всех, подоба́ющих и взыска́ющих/ и ве́рою и доброде́телию прибега́ющих к ра́це твое́й пречестне́й,// я́же держи́т прах твой.
Святому Стефану Урошу V, царю Сербскому · Тропарь, глас 3
Ю́ношески процве́л еси́/ во оте́чествии твое́м, добро́тою украше́н,/ и непра́ведную и безвре́менную смерть подъя́л еси́,/ У́роше всече́стне;/ ца́рскаго ко́рене плод сла́док,/ а́ще и не во вре́мя созре́в,/ в Госпо́дню жи́тницу всели́лся еси́/ и жа́лость ве́лию сро́дству твоему́ оста́вил еси́.// Моли́ся о нас, творя́щих святу́ю па́мять твою́.
Святому Стефану Урошу V, царю Сербскому · Кондак, глас 6
О́трасли благоро́дныя цвет прекра́сный яви́лся еси́, У́роше всече́стне,/ за́вистию бо убие́н был еси́ от твои́х при́сных,/ Бо́жиим же Ду́хом просвеще́н,/ святоро́днаго пле́мене свят был еси́/ и, му́ченическим венце́м увя́зся, в черто́зе Небе́снем водворя́ешися.// Моли́ся о нас, свя́те, творя́щих любо́вию па́мять твою́.
Священномученику Иоанну Державину · Тропарь, глас 2
Цвет ди́вный лу́га духо́внаго/ новому́чеников Це́ркве Ру́сския/ яви́лся еси́, па́стырю до́брый, свя́те Иоа́нне,/ ты бо, ча́да твоя́ в ве́ре наставля́я,/ лю́тых преще́ний не убоя́лся еси́/ и, глад, нищету́, темни́чная заключе́ния претерпева́я,/ наве́ты гони́телей отве́ргл еси́./ Сего́ ра́ди му́ченическаго венца́ сподо́би тя Подвигополо́жник Христо́с,/ Его́же моли́ спасти́ся душа́м на́шим.
Священномученику Иоанну Державину · Кондак, глас 8
Непобеди́мыя твоея́ ве́ры мучи́тели не одоле́ша/ и от любве́ Бо́жия тя не разлучи́ша,/ ты бо, я́ко до́брый во́ин Христо́в, безбо́жным противоста́в,/ оклевета́ния и темни́чнаго заточе́ния не убоя́лся еси́/ и Го́спода да́же до сме́рти испове́дал еси́./ Те́мже, восхваля́юще по́двиги твоя́, те́пле вопие́м:/ священному́чениче Иоа́нне,/ моли́ Ми́лостиваго Бо́га спасти́ся душа́м на́шим.
Священномученику Сергию Кудрявцеву, пресвитеру Анискинскому · Тропарь, глас 2
Смире́нием и кро́тостию украси́вся,/ па́стырь до́брый яви́лся еси́,/ священному́чениче Се́ргие,/ и, му́жественне во благоче́стии подвиза́вся,/ от безбо́жных пострада́л еси́ да́же до кро́ве./ Сего́ ра́ди, му́ченический вене́ц стяжа́в,/ ве́лие дерзнове́ние и́маши ко Го́споду,// Того́ моли́ спасти́ся душа́м на́шим.
Священномученику Сергию Кудрявцеву, пресвитеру Анискинскому · Кондак, глас 3
Я́ко смире́нный Христо́в служи́тель,/ гоне́ния лю́тая от богобо́рцев претерпе́л еси́,/ ны́не же с ли́ки новому́ченик Це́ркве Ру́сския/ в ри́зах бе́лых А́гнцу Бо́жию предстои́ши,/ о́тче наш Се́ргие./ Моли́ Его́же всем се́рдцем возлюби́л еси́,/ в правосла́вней ве́ре нам утверди́тися// и спасти́ся душа́м на́шим.
Священномученику Константину Некрасову · Тропарь, глас 3
О́браз ве́рным во святе́м житии́ твое́м явля́я,/ священному́чениче Константи́не,/ Христа́ ра́ди пострада́л еси́ да́же до сме́рти,/ те́мже моли́ Ми́лостиваго Бо́га/ в ве́ре правосла́вней нас утверди́ти// и от смертоно́сных страсте́й изба́вити.
Священномученику Константину Некрасову · Кондак, глас 8
Святы́й священному́чениче Константи́не,/ изгна́ния, темни́чная заключе́ния/ и от безбо́жных беззако́нное убие́ние/ за Христа́ претерпе́л еси́,/ стра́ждущих от винопи́тия исцеля́я,/ воздержа́нию, чистоте́ и благоче́стию науча́я,/ ны́не же Христу́ Бо́гу за всех моли́ся/ дарова́ти нам грехо́в оставле́ние// и душа́м на́шим спасе́ние.
Пресвятой Богородице пред иконой Ея «Геронтисса» · Тропарь, глас 4
Я́ко пресве́тлая звезда́,/ просия́ Боже́ственными чудесы́/ святы́й о́браз Тво́й, Изба́вительнице,/ луча́ми благода́ти и милосе́рдия Твоего́/ озари́в в но́щи скорбе́й су́щих./ Пода́ждь у́бо и на́м, Всеблага́я Де́во,/ избавле́ние от бе́д,/ исцеле́ние неду́гов душе́вных и теле́сных,/ спасе́ние и ве́лию ми́лость.
Пресвятой Богородице пред иконой Ея «Геронтисса» · Кондак, глас 8
Ко ико́не Твое́й, Пресвята́я Госпоже́, бе́дствовавшии с ве́рою прите́кше, заступле́нием Твои́м изба́вишася от злы́х, но я́ко Ма́терь Христа́ Бо́га и на́с свободи́ от лю́тых обстоя́ний, вре́менных и ве́чных, да зове́м Ти́: ра́дуйся Изба́вительнице на́ша от все́х бе́д.
Во вторник, св. Иоанну Предтече · Тропарь, глас 2
Па́мять пра́веднаго с похвала́ми,/ тебе́ же довле́ет свиде́тельство Госпо́дне, Предте́че:/ показа́л бо ся еси́ вои́стину и проро́ков честне́йший,/ я́ко и в струя́х крести́ти сподо́бился еси́ Пропове́даннаго./ Те́мже за и́стину пострада́в ра́дуяся,/ благовести́л еси́ и су́щим во а́де Бо́га я́вльшагося пло́тию,/ взе́млющаго грех ми́ра,// и подаю́щаго нам ве́лию ми́лость.
Во вторник, св. Иоанну Предтече · Кондак, глас 2
Проро́че Бо́жий и Предте́че благода́ти,/ главу́ твою́ я́ко ши́пок свяще́ннейший от земли́ обре́тше,/ исцеле́ния всегда́ прие́млем,// и́бо па́ки, я́коже пре́жде, в ми́ре пропове́дуеши покая́ние.