Пресвятой Богородице пред иконой Ея «Знамение» · Тропарь, глас 4
Я́ко необори́мую сте́ну и исто́чник чуде́с/ стяжа́вше Тя, раби́ Твои́,/ Богоро́дице Пречи́стая,/ сопроти́вных ополче́ния низлага́ем./ Те́мже мо́лим Тя:/ мир гра́ду Твоему́ да́руй// и душа́м на́шим ве́лию ми́лость.
Пресвятой Богородице пред иконой Ея «Знамение» · Кондак, глас 4
Честна́го о́браза Твоего́ зна́мение/ пра́зднующе, лю́дие Твои́, Богороди́тельнице,/ и́мже ди́вную побе́ду на сопроти́вныя гра́ду Твоему́ дарова́ла еси́./ Те́мже Тебе́ ве́рою взыва́ем:// ра́дуйся, Де́во, христиа́н Похвало́.
Великомученику Иакову Персянину · Тропарь, глас 4
Му́ченик Твой, Го́споди, Иа́ков/ во страда́нии свое́м вене́ц прия́т нетле́нный от Тебе́, Бо́га на́шего:/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами// спаси́ ду́ши на́ша.
Великомученику Иакову Персянину · Кондак, глас 2
Уве́рився до́брою супру́жницею, терпеливоду́шне,/ и стра́шнаго Суди́ща убоя́вся,/ Пе́рское повеле́ние и страх, Иа́кове, поплева́л еси́/ и яви́лся еси́ му́ченик честны́й,// те́лом, я́ко розга́, ре́жемь.
Преподобному Палладию Александрийскому · Тропарь, глас 1
Мона́шествовав Богоуго́дно, Богоно́сне о́тче наш,/ моли́твою и посто́м Бо́га взыска́л еси́/ и был еси́ прия́телище чи́сто Ду́ха,/ блиста́я ве́рным доброде́тельныя зари́,/ и́миже просвеща́еши вся чту́щия тя./ Сла́ва просла́вльшему тя Христу́,/ сла́ва Укре́пльшему тя,// сла́ва Де́йствующему тобо́ю всем исцеле́ние.
Святителю Иакову, епископу Ростовскому · Тропарь, глас 4
Избра́н от ю́ности Бо́гови быв,/ святи́телю Иа́кове,/ сего́ ра́ди архиере́йства са́ном почте́н,/ упа́сл еси́ лю́ди, я́же тебе́ Бо́гом вруче́нныя,/ те́мже и по преставле́нии/ чуде́с дарова́ния от Бо́га прия́л еси́/ исцеля́ти разли́чныя недуги./ Моли́ о нас, соверша́юших честную па́мять твою́,// да тебе́ непреста́нно велича́ем.
Святителю Иакову, епископу Ростовскому · Кондак, глас 8
Я́ко архиере́ев сопресто́льник/ и святи́телем изря́дный побо́рник был еси́, святи́телю Иа́кове,/ непреста́нно сохраня́й оте́чество твое́, град же и лю́ди,/ тебе́ ве́рою почита́ющия и честны́м моще́м твои́м покланя́ющияся,// да велегла́сно тебе́ вопие́м:/ ра́дуйся, Иа́кове Богому́дре.
Благоверному князю Всеволоду, в Крещении Гавриилу, Псковскому · Тропарь, глас 4
Измла́да яви́лся еси́, Богому́дре кня́же Гаврии́ле,/ Боже́ственный сосу́д, избра́н Бо́гови,/ благоче́стием воспита́н, ве́ру непоро́чну соблю́д/ и мно́ги святы́я це́ркви устро́ив,/ изгна́ние претерпе́л еси́ от свои́х,/ я́коже и целому́дрии прароди́тели твои́, от бра́та убие́ние./ С ни́миже предстоя́ Святе́й Тро́ице,/ моли́ся держа́ве Росси́йстей сохране́нной бы́ти // и всем нам спасти́ся.
Благоверному князю Всеволоду, в Крещении Гавриилу, Псковскому · Кондак, глас 8
Многому́дренно пресели́вся во град Псков, блаже́нне кня́же Гаврии́ле,/ плод благи́й Бо́гови в жи́зни сей был еси́, присноцвету́щ доброде́тельми, и я́коже Дави́д незло́бием:/ того́ ра́ди получи́л еси́ жизнь ве́чную на Небесе́х,/ всегда́ зря Святу́ю Трои́цу./ Моли́ изба́витися нам от вся́ких бед, да зове́м ти́:// ра́дуйся, утвержде́ние гра́ду на́шему.
Блаженному Андрею, Христа ради юродивому, Симбирскому · Тропарь, глас 4
Небе́сный наш засту́пниче, / за нас пред Бо́гом моли́твенниче, / гра́да Симби́рска утеше́ние и похвало́, / в ско́рбех и беда́х ско́рый помо́щниче. / Ны́не, блаже́нне Андре́е, к тебе́ вопие́м, / на ра́ку честны́х моще́й твои́х взира́юще / и соверше́нное принося́ще восхвале́ние: / простира́я нам ру́ку по́мощи твоея́, // наста́ви нас на путь покая́ния.
Блаженному Андрею, Христа ради юродивому, Симбирскому · Кондак, глас 4
Юро́дства оде́ждею укра́шен еси́, / попече́ние презре́в о пло́ти тле́нней, / вене́ц нетле́ния стяжа́л еси́ небе́сный. / Духо́вною нището́ю обле́клся еси́ / и по сло́ву Спа́сову / в Ца́рствие ве́чное всели́лся еси́ / и Престо́лу Бо́жию предстоя́, / немо́лчно о нас ко Христу́ взыва́еши, // блаже́нне Андре́е, преди́вный чудотво́рче.
Собору новомучеников и исповедников Радонежских · Тропарь, глас 5
Новому́ченицы и испове́дницы земли́ Ра́донежския,/ ве́рная ча́да Се́ргия преподо́бнаго,/ вы, гоне́ний лю́тых не убоя́вшеся,/ ве́ры ра́ди до́бре подвиза́стеся/ и страда́ния Христа́ ра́ди претерпе́сте./ Те́мже ны́не в Небе́сных черто́зех пребыва́ете/ и прославля́ете Тро́ицу Живонача́льную,// Ю́же моли́те спасти́ся душа́м на́шим.
Собору новомучеников и исповедников Радонежских · Кондак, глас 3
Я́ко цве́ти кра́снии и благоуха́ннии,/ святи́и новому́ченицы и испове́дницы,/ зе́млю Ра́донежскую украси́сте,/ ю́же Се́ргий преподо́бный житие́м просла́ви./ С ни́мже моли́теся ко Го́споду,/ е́же во и́стинней ве́ре нам ходи́ти// и спасти́ся душа́м на́шим.
Преподобномученику Крониду (Любимову) · Тропарь, глас 1
Преподо́бному Се́ргию от ю́ности после́дуя,/ о́тче богому́дре Крони́де,/ ве́ру во Святу́ю Тро́ицу стяжа́л еси́/ и да́же в ста́рости масти́те до кро́ве сохрани́л еси́./ Те́мже и мы, ча́да твоя́, любо́вию вопие́м ти:/ сла́ва Да́вшему ти си́лу терпе́ния,/ сла́ва Увенча́вшему тя я́ко му́ченика,// сла́ва Спаса́ющему тобо́ю ду́ши на́ша.
Преподобномученику Крониду (Любимову) · Кондак, глас 2
Я́ко ве́рный учени́к преподо́бнаго Се́ргия,/ послуша́нием, смире́нием и моли́твою/ ду́шу твою́ очи́стил еси́, Крони́де приснопа́мятне,/ и Бо́жиим промышле́нием во игу́мена оби́тели Тро́ицкия/ досто́йно поста́влен был еси́./ Во дни же гоне́ния лю́таго/ за Христа́ и вве́ренную ти бра́тию/ я́ко му́ченик пострада́л еси́./ Сего́ ра́ди ны́не, предстоя́ Святе́й Тро́ице,/ моли́ е́же Ла́вре Се́ргиевой утвержде́нней бы́ти// и спасти́ся душа́м на́шим.
Преподобномученику Никону (Беляеву) · Тропарь, глас 4
Преподобному́чениче Ни́коне,/ учи́телю прему́дрый и па́стырю до́брый,/ ты во дни гоне́ний, на Це́рковь Ру́сскую воздви́гнутых,/ ста́до Христо́во до́бре сохрани́ти потща́лся еси́,/ пропове́дании ве́рныя укрепля́я/ и к Ца́рству Небе́сному управля́я./ Те́мже, лю́тыми мучи́тели сме́рти пре́дан быв,/ ны́не пред Престо́лом Бо́жиим предстои́ши,/ преподобному́чениче Ни́коне,/ вене́ц побе́дный от Христа́ Бо́га прия́л еси́,/ Его́же моли́ Оте́честву на́шему в ми́ре сохрани́тися// и спасти́ся душа́м на́шим.
Преподобномученику Никону (Беляеву) · Кондак, глас 7
Пастыренача́льника Христа́ спаси́тельныя за́поведи возлюби́вый,/ да́нную ти па́ству до́бре упа́сл еси́,/ преподобному́чениче Ни́коне,/ и за испове́дание ве́ры во Христа́ страда́ния и смерть прия́л еси́./ Сего́ ра́ди, я́ко име́яй дерзнове́ние ко Го́споду,/ моли́ дарова́ти нам мир// и ве́лию ми́лость.
Священномученику Иоанну Смирнову · Тропарь, глас 5
До́брым по́двигом подвиза́яся,/ украше́ние иере́ем яви́лся еси́, о́тче Иоа́нне,/ любому́дрию же отце́в Сина́йских поуча́яся,/ ра́зум и́стине Христо́вой покори́л еси́,/ па́стве твое́й о́браз чистоты́ и благоче́стия яви́в,/ кро́вию му́ченическою житие́ запечатле́л еси́./ Те́мже Бо́гу предстоя́,// моли́ спасти́ся душа́м на́шим.
Священномученику Иоанну Смирнову · Кондак, глас 2
Моли́твенника те́пла/ обре́те тя земля́ Моско́вская,/ священному́чениче Иоа́нне,/ ты бо, в па́стырских труде́х усе́рдно подвиза́яся,/ мно́гия на стези́ спасе́ния наста́вил еси́/ и, от Христа́ му́ченическим венце́м украси́вся,/ во оби́телех ра́йских водвори́лся еси́.// Те́мже тя любо́вию велича́ем.
Священномученику Феодору Дорофееву · Тропарь, глас 2
Прииди́те, боголюби́вии лю́дие,/ восхва́лим ве́рнаго сы́на Це́ркве Ру́сския,/ священному́ченика Фео́дора добропобе́днаго,/ и́же, страда́ния за Христа́ претерпе́в/ и му́ченическую смерть прие́м,/ дар досто́ин Бо́га Вы́шняго яви́ся,/ те́мже с наде́ждею к нему́ возопии́м:/ моли́ся о нас ко Го́споду/ в ве́ре правосла́вней утверди́тися// и спасти́ся душа́м на́шим.
Священномученику Феодору Дорофееву · Кондак, глас 5
Ве́рность Христу́ Бо́гу до сме́рти сохрани́в,/ служи́тель непоро́чен Це́ркве был еси́,/ священному́чениче Фео́доре,/ па́ству же твою́ ева́нгельскою любо́вию просвеща́я,/ пропове́дник ре́вностен Воскресе́ния Христо́ва яви́лся еси́./ Сего́ ра́ди го́рькия рабо́ты и лю́тую кончи́ну претерпе́в,/ Па́схи ве́чныя ны́не наслажда́ешися./ Го́сподеви моли́ся/ мир Оте́честву на́шему дарова́ти// и душа́м на́шим ве́лию ми́лость.
Пресвятой Богородице пред иконой Ея «Знамение» Курская-Коренная · Тропарь, глас 4
Я́ко необори́мую сте́ну и исто́чник чуде́с/ стяжа́вше Тя раби́ Твои́,/ Богоро́дице пречи́стая,/ сопроти́вных ополче́ния низлага́ем./ Те́мже мо́лим Тя:/ мир гра́ду Твоему́ да́руй// и душа́м на́шим ве́лию ми́лость.
Пресвятой Богородице пред иконой Ея «Знамение» Курская-Коренная · Кондак, глас 4
Честна́го о́браза Твоего́ зна́мение/ пра́зднующе лю́дие Твои́, Богороди́тельнице,/ и́мже ди́вную побе́ду на сопроти́вныя гра́ду Твоему́ дарова́ла еси́./ Те́мже Тебе́ ве́рою взыва́ем:// ра́дуйся, Де́во, христиа́н похвало́.
Пресвятой Богородице пред иконой Ея «Знамение» Абалакская · Тропарь, глас 4
Днесь, я́ко со́лнце незаходи́мое,/ све́тло сия́ет о́браз Твой, Пречи́стая,/ в ве́си Абала́кской на возду́се/ вдови́це чу́дне яви́вшийся./ И мы, припа́дающе к нему́,/ Богоро́дице уми́льно вопие́м:/ о, Всепе́тая Влады́чице,/ мир оби́тели Твое́й да́руй// и душа́м на́шим ве́лию ми́лость.
Пресвятой Богородице пред иконой Ея «Знамение» Абалакская · Кондак, глас 4
Ева́нгелия Христо́ва благове́стник Лука́/ о́бразы Твоя́, Пречи́стая, дре́вле изобрази́,/ вдови́ца же, еди́н от них чу́дне узре́вши,/ возвести́ нам повеле́ние Твое́,/ да ве́рнии, к Тебе́ притека́юще, зову́т:/ ра́дуйся, Влады́чице,// Зна́мение ми́лости Твоея́ нам явля́ющая.
Пресвятой Богородице пред иконой Ея «Знамение» Корчемная · Тропарь, глас 4
Я́ко необори́мую сте́ну и исто́чник чуде́с/ стяжа́вше Тя раби́ Твои́,/ Богоро́дице пречи́стая,/ сопроти́вных ополче́ния низлага́ем./ Те́мже мо́лим Тя:/ мир гра́ду Твоему́ да́руй// и душа́м на́шим ве́лию ми́лость.
Пресвятой Богородице пред иконой Ея «Знамение» Корчемная · Кондак, глас 4
Честна́го о́браза Твоего́ зна́мение/ пра́зднующе лю́дие Твои́, Богороди́тельнице,/ и́мже ди́вную побе́ду на сопроти́вныя гра́ду Твоему́ дарова́ла еси́./ Те́мже Тебе́ ве́рою взыва́ем:// ра́дуйся, Де́во, христиа́н похвало́.
В четверг, св. апостолам · Тропарь, глас 3
Апо́столи святи́и,/ моли́те Ми́лостиваго Бо́га,/ да прегреше́ний оставле́ние// пода́ст душа́м на́шим.
В четверг, св. апостолам · Кондак, глас 2
Тве́рдыя и боговеща́нныя пропове́датели,/ верх апо́столов Твои́х, Го́споди,/ прия́л еси́ в наслажде́ние благи́х Твои́х и поко́й;/ боле́зни бо о́нех и смерть прия́л еси́ па́че вся́каго всепло́дия,// Еди́не све́дый серде́чная.
В четверг, святителю Николаю · Тропарь, глас 4
Пра́вило ве́ры и о́браз кро́тости,/ воздержа́ния учи́теля/ яви́ тя ста́ду твоему́/ Я́же веще́й И́стина./ Сего́ ра́ди стяжа́л еси́ смире́нием высо́кая,/ нището́ю бога́тая,/ о́тче священнонача́льниче Нико́лае,/ моли́ Христа́ Бо́га,// спасти́ся душа́м на́шим.
В четверг, святителю Николаю · Кондак, глас 3
В Ми́рех, свя́те, священноде́йствитель показа́лся еси́,/ Христо́во бо, преподо́бне, Ева́нгелие испо́лнив,/ положи́л еси́ ду́шу твою́ о лю́дех твои́х/ и спасл еси́ непови́нныя от сме́рти./ Сего́ ра́ди освяти́лся еси́,// я́ко вели́кий таи́нник Бо́жия благода́ти.