Святителю Филарету, митрополиту Московскому и Коломенскому · Тропарь, глас 4
Ду́ха Свята́го благода́ть стяжа́в,/ богому́дре святи́телю Филаре́те,/ и́стину и пра́вду ра́зумом просвеще́нным/ лю́дем пропове́дал еси́,/ мир и ми́лость се́рдцем умиле́нным/ стра́ждущим яви́л еси́,/ я́ко учи́тель ве́ры и страж неусы́пный/ па́ству росси́йскую жезло́м пра́вости сохрани́л еси́./ Сего́ ра́ди ко Христу́ Бо́гу дерзнове́ние име́я,/ моли́ дарова́ти Це́ркве утвержде́ние,// и душа́м на́шим спасе́ние.
Святителю Филарету, митрополиту Московскому и Коломенскому · Кондак, глас 2
Я́ко и́стинный подража́тель преподо́бнаго Се́ргия,/ доброде́тель измла́да возлюби́л еси́,/ богоблаже́нне Филаре́те./ Я́ко па́стырь пра́ведный и испове́дник непоро́чный,/ по святе́м преставле́нии/ от безбо́жных поруга́ние и поноше́ния прия́л еси́,/ Бог же зна́меньми и чудесы́ тя просла́ви// и засту́пника Це́ркве на́шея яви́.
Мученику Варлааму Антиохийцу · Тропарь, глас 4
Му́ченик Твой, Го́споди, Варлаа́м/ во страда́нии свое́м вене́ц прия́т нетле́нный от Тебе́, Бо́га на́шего,/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами// спаси́ ду́ши на́ша.
Мученику Варлааму Антиохийцу · Кондак, глас 4
Яви́лся еси́, преудивле́н кре́постию всесожже́ния,/ лива́н благово́нен, себе́ прине́сл еси́ же́ртву Христу́,/ и, вене́ц по́чести прии́м, Варлаа́ме,// при́сно моли́ за ны, страда́льче.
Преподобному Иоасафу, царевичу Индийскому · Тропарь, глас 4
От духо́внаго наста́вника научи́вся,/ царю́ Иоаса́фе, Бо́га позна́ти,/ Креще́нием же просвети́вся,/ лю́ди к ве́ре обрати́л еси́,/ и отцу́ твоему́ от купе́ли прие́мник быв,/ ца́рство оста́вив, пусты́ню дости́гл еси́,/ и в ней трудолю́бне подвиза́лся еси́./ Моли́ Христа́ Бо́га со учи́телем твои́м Варлаа́мом,// спасти́ся душа́м на́шим.
Преподобному Иоасафу, царевичу Индийскому · Кондак, глас 8
Ве́дый твое́ из младе́нства благо́е изволе́ние, Иоаса́фе, еди́н сердцеве́дец Бог,/ и от ца́рствия земна́го в мона́шеское пребыва́ние приведы́й тя,/ вели́кому Варлаа́му после́довати сподо́би./ С ни́мже и ны́не го́рний Иерусали́м всесве́тлый оте́чество име́я,/ жела́емыя добро́ты красно́ наслажда́яся Святы́я Тро́ицы,/ мо́лим тя, ца́рская красото́,// помина́й нас, ве́рою чту́щия тя.
Преподобному Варлааму Индийскому · Тропарь, глас 8
Слез твои́х исто́чники пусты́ни безпло́дное возде́лал еси́,/ и и́же из глубины́ воздыха́ньми во сто трудо́в уплодоноси́л еси́,/ и был еси́ свети́льник вселе́нныя, сия́я чудесы́, Варлаа́ме о́тче наш,// моли́ Христа́ Бо́га спасти́ся душа́м на́шим.
Преподобному Варлааму, игумену Печерскому, в Ближних пещерах · Тропарь, глас 1
Ми́ра кра́сная и сла́ву его́ оста́вль,/ прите́кл еси́ в пеще́ру,/ иде́же от си́лы преуспева́я в си́лу,/ был еси́ вождь Христо́ва ста́да, всесла́вне Варлаа́ме,/ е́же я́ко упас до́бре, упаси́ и нас, мо́лим тя,// сохраня́я от всех зол, да тя ублажа́ем.
Преподобному Варлааму, игумену Печерскому, в Ближних пещерах · Кондак, глас 2
Оте́ческаго преще́ния не устраши́лся еси́,/ ласка́ниям того́ не повину́лся еси́,/ ниже́ ле́стию низложи́лся еси́ же́нскою, всече́стне Варлаа́ме,/ но непобеди́мь от тех пребы́л еси́,// наде́яся на Го́спода своего́, Ему́же моли́ся о душа́х на́ших.
Преподобномученику Адриану Пошехонскому, Ярославскому · Тропарь, глас 4
Христо́ву му́ченику Адриа́ну тезоимени́т был еси́, преподо́бне,/ мно́гия труды́ подъя́л еси́ в жи́зни вре́менней,/ оби́тель и́ноческую созида́я в пусты́ни,/ иде́же пострада́л еси́ да́же до кро́ве от злых разбо́йник/ и му́ченическую смерть от них прия́л еси́,/ Адриа́не сла́вне,/ чуде́с благода́тию обогати́вся,/ предстои́ши всех Царю́, Христу́ Бо́гу,// Его́же моли́ спасти́ся душа́м на́шим.
Преподобномученику Адриану Пошехонскому, Ярославскому · Кондак, глас 4
Христа́ ра́ди до́блественне претерпе́л еси́/ и вене́ц нетле́ния от Него́ восприя́л еси́ страда́ния своего́,/ приходя́щим же с ве́рою к тебе́ подае́ши цельбы́,/ о преподобному́чениче Адриа́не, приснопа́мятне,// моли́твениче о душа́х на́ших.
Преподобному Порфирию Кавсокаливиту · Тропарь, глас 8
Апостольскою ревностию жительствуя / и Христово имя непрестанно призывая, всем любовь Божию проповедуя,/ выну в той пребывал еси, многия души исцеляя и ко воскресшему Господу приводя. Темже, наследовавый селения святых, / потщися и настави нас, да приидем и мы во объятия Божия,/ радостно вопиюще ти: / радуйся, преподобне отче Порфирие.
Преподобному Порфирию Кавсокаливиту · Кондак, глас 3
Радуйся, Афона смиренное овча, / Порфирие, Любве проповедниче, / монахов славо, святых удобрение. Овому бо Духом дадеся слово премудрости,/ другому же слово разума и действия сил, тебе же купно вся открышася,/ яко таиннику Божия благодати.
Преподобномученикам Гуслицким Серафиму (Булашову), Иоасафу (Крымзину) и Петру (Мамонтову) · Тропарь, глас 4
Днесь све́тло красу́ется оби́тель Гу́слицкая/ прославля́ющи преподо́бных му́ченик свои́х,/ Серафи́ма, Иоаса́фа и Петра́,/ ти́и бо, гоне́ний многоразли́чных и сме́рти не убоя́вшеся,/ ве́ры Правосла́вныя тве́рдии испове́дницы яви́шася/ и, крест страда́ния на ме́сте муче́ния в Бу́тове подъе́мше,/ венцы́ нетле́нными от Христа́ увязо́шася./ Те́мже, новому́ченицы святи́и,/ моли́те Всеми́лостивого Спа́са/ долго́в разреше́ния нам дарова́ти// и душа́м на́шим ве́лию ми́лость.
Преподобномученикам Гуслицким Серафиму (Булашову), Иоасафу (Крымзину) и Петру (Мамонтову) · Кондак, глас 6
Преподобному́ченицы Твои́, Го́споди,/ руга́нием и ра́нами искуше́ния мно́гая прия́ша,/ еще́ же у́зами и темни́цею томи́ми бы́ша./ Оба́че, да́же до кро́ве проти́ву греха́ подвиза́вшеся,/ пра́вду соде́яша и Воскресе́нию Твоему́ приобщи́шася./ Тех моли́твами, Христе́ Бо́же,/ да́руй нам с терпе́нием предлежа́щий по́двиг соверши́ти// и Ца́рствия Небе́снаго дости́гнути.
Божией Матери пред иконой Ея «В скорбех и печалех Утешение» · Тропарь, глас 5
Утоли́ боле́зни многовоздыха́ющия души́ моея́, Утоли́вшая вся́ку сле́зу от лица́ земли́: Ты́ бо челове́ком боле́зни отго́ниши и гре́шных ско́рби разруша́еши, Тебе́ бо вси́ стяжа́хом наде́жду и утвержде́ние, Пресвята́я Ма́ти Де́во.
Божией Матери пред иконой Ея «В скорбех и печалех Утешение» · Кондак, глас 6
Не вве́ри мя́ челове́ческому предста́тельству, Пресвята́я Влады́чице, но приими́ моле́ние раба́ Твоего́: ско́рбь бо обдержи́т мя́, терпе́ти не могу́ де́монскаго стреля́ния, покро́ва не и́мам, ниже́ где́ прибе́гну окая́нный, всегда́ побежда́емь, и утеше́ния не и́мам, ра́зве Тебе́, Влады́чице ми́ра, упова́ние и предста́тельство ве́рных, не пре́зри моле́ние мое́, поле́зно сотвори́.
В среду, св. Кресту · Тропарь, глас 1
Спаси́, Го́споди, лю́ди Твоя́/ и благослови́ достоя́ние Твое́,/ побе́ды на сопроти́вныя да́руя// и Твое́ сохраня́я Кресто́м Твои́м жи́тельство.
В среду, св. Кресту · Кондак, глас 4
Вознесы́йся на Крест во́лею,/ тезоимени́тому Твоему́ но́вому жи́тельству,/ щедро́ты Твоя́ да́руй, Христе́ Бо́же,/ возвесели́ нас си́лою Твое́ю,/ побе́ды дая́ нам на сопоста́ты,/ посо́бие иму́щим Твое́ ору́жие ми́ра,// непобеди́мую побе́ду.