Воскресные · Тропарь, глас 1
Ка́мени запеча́тану от иуде́й/ и во́ином стрегу́щим Пречи́стое Те́ло Твое́,/ воскре́сл еси́ тридне́вный, Спа́се,/ да́руяй ми́рови жи́знь./ Сего́ ра́ди си́лы небе́сныя вопия́ху Ти́, Жизнода́вче:/ сла́ва воскресе́нию Твоему́, Христе́,/ сла́ва Ца́рствию Твоему́,// сла́ва смотре́нию Твоему́, еди́не Человеколю́бче.
Воскресные · Кондак, глас 1
Воскре́сл еси́ я́ко Бо́г из гро́ба во сла́ве,/ и ми́р совоскреси́л еси́;/ и естество́ челове́ческое я́ко Бо́га воспева́ет Тя́, и сме́рть исчезе́;/ Ада́м же лику́ет, Влады́ко;/ Е́ва ны́не от у́з избавля́ема ра́дуется, зову́щи:// Ты́ еси́, И́же все́м подая́, Христе́, воскресе́ние.
Воздвижению Честнаго и Животворящего Креста Господня · Тропарь, глас 1
Спаси́, Го́споди, лю́ди Твоя́/ и благослови́ достоя́ние Твое́,/ побе́ды на сопроти́вныя да́руя// и Твое́ сохраня́я Кресто́м Твои́м жи́тельство.
Воздвижению Честнаго и Животворящего Креста Господня · Кондак, глас 4
Вознесы́йся на Крест во́лею,/ тезоимени́тому Твоему́ но́вому жи́тельству/ щедро́ты Твоя́ да́руй, Христе́ Бо́же,/ возвесели́ нас си́лою Твое́ю,/ побе́ды дая́ нам на сопоста́ты,/ посо́бие иму́щим Твое́ ору́жие ми́ра,// непобеди́мую побе́ду.
Святителю Димитрию, митрополиту Ростовскому · Тропарь, глас 8
Правосла́вия ревни́телю и раско́ла искорени́телю,/ Росси́йский целе́бниче, и но́вый к Бо́гу моли́твенниче,/ списа́ньми твои́ми бу́их уцелому́дрил еси́,/ цевни́це духо́вная, Дими́трие блаже́нне,// моли́ Христа́ Бо́га спасти́ся душа́м на́шим.
Святителю Димитрию, митрополиту Ростовскому · Кондак, глас 4
Звезду́ Росси́йскую от Ки́ева возсия́вшую,/ и чрез Но́вград Се́верский в Росто́в дости́гшую,/ всю же страну́ сию́ уче́ньми и чудесы́ озари́вшую,/ ублажи́м златослове́снаго учи́теля Дими́трия,/ той бо все́м вся написа́, я́же к наставле́нию,/ да всех приобря́щет, я́коже Па́вел Христу́,// и спасе́т правове́рием ду́ши на́ша.
Апостолу от 70-ти Кодрату, епископу Афинскому и Магнезийскому · Тропарь, глас 3
Апо́столе святы́й Кодра́те,/ моли́ ми́лостиваго Бо́га,/ да прегреше́ний оставле́ние// пода́ст душа́м на́шим.
Апостолу от 70-ти Кодрату, епископу Афинскому и Магнезийскому · Кондак, глас 8
Я́ко священнонача́льника че́стна и страда́льца тверде́йша,/ вселе́нная прино́сит Тебе́, Го́споди, Кодра́та апо́стола/ и пе́сньми почита́ет честну́ю его́ па́мять,/ прося́щи всегда́ прегреше́ний оставле́ния// тем дарова́тися пою́щим его́, Благоутро́бне.
Преподобному Иосифу Заоникиевскому · Тропарь, глас 5
Смиренному́дрием наказа́ние благоду́шне прие́мля,/ и́же от Небе́с неизрече́нный дар прия́ти сподо́бился,/и в пло́ти сый, преподо́бне,/ безпло́тен в служе́нии свое́м к Богома́тери трудолю́бне подвиза́ся,/ бде́нии, поще́нии, слеза́ми и моли́твами,/ и́миже и пусты́ню многожи́тельну устро́ил еси́,/ благоухищре́нным же юро́дством челове́ческия сла́вы избежа́./ Сего́ ра́ди Всевы́шний Мздовозда́тель/ в коне́ц ве́ка сего́ сугу́бо тя просла́ви,/ и гроб твой святы́й точе́нием чуде́с обогати́ся,/ Его́же моли́, преподо́бне о́тче наш Ио́сифе,// дарова́ти нам отпуще́ние грехо́в и ве́лию ми́лость.
Преподобному Иосифу Заоникиевскому · Кондак, глас 8
Вы́шних благ жела́яй,/ преоби́дел еси́ до́лу влеку́щая мудрова́ния,/ и́бо трудолюби́вое свое́ те́ло/ о́стрым власяны́м плете́нием стерл еси́,/ и бысть благоуго́ден служи́тель Богома́тере,/ стра́ждущим в неду́зех явля́яся, ско́ро помога́еши,/ с ве́рою притека́ющим к тебе́ неоску́дное здра́вие подае́ши./ Сего́ ра́ди зове́м ти:/ разреши́ на́ша боле́зни душе́вныя и теле́сныя,/ е́же к Бо́гу моли́твами твои́ми,/ началообра́зный смире́нию наста́вниче, о́тче наш Богому́дре Ио́сифе,// мона́хом удобре́ние.
Собору святых Кубанской митрополии · Тропарь, глас 4
Днесь ликовству́ет земля́ Куба́нская, / прославля́ющи святи́тели, преподо́бныя и новому́ченики своя́, / во благоче́стии подвиза́вшияся и страда́ньми украси́вшияся,/ и небе́сныя венцы́ от Го́спода прие́мшия. / Те́мже пра́зднующе свяще́нное их торжество́, / с ве́рою и любо́вию вопие́м:/ святи́и сро́дницы и те́плии хода́таи на́ши,/ моли́те Оте́честву мир дарова́ти // и душа́м на́шим ве́лию ми́лость.
Собору святых Кубанской митрополии · Кондак, глас 2
Тве́рдии Правосла́вия испове́дницы/ и ве́ры апо́стольския служи́телие,/ вси святи́и в земли́ Куба́нстей просия́вшии/ и преде́лы ю́жныя земли́ Росси́йския просла́вившии./ Восхваля́юще по́двиги и труды́ ва́ша,/ страда́ния же и муче́ния почита́юще,/ во умиле́нии вси зове́м: // ра́дуйтеся, земли́ Куба́нския похвало́ и Це́ркве на́шея украше́ние.
Собору святых, в земле Германской просиявших · Тропарь, глас 4
Иже в земли Германской прославльшиися/ святитилие, мученицы, преподобнии, праведнии и вси святии,/ верою, подвиги благочестия, любовию, кротостию,/ словом и житием Богу благоугодившии/ и венцы нетления и славы украсившиися,/ молите Христа Бога нашего даровати мир стране нашей// и душам нашим в мире спастися.
Собору святых, в земле Германской просиявших · Кондак, глас 4
На земли благочестно пожившии,/ святии, в земли Германской просиявшии,/ и ныне на Небесех со ангелы радуетеся/ и Троицу Святую – Отца, и Сына, и Святаго Духа во Едином Божестве прославляете./ Мы же, земнороднии, молитвенно ублажающе вас/ и святую память, совершающе, молим:/ принесите наша молитвы к Небесному Престолу Господа Вседержителя,/ да вашим ходатайством// дарует мир и спасение душам нашим.
Преподобномученику Маврикию (Полетаеву) и мученику Василию Кондратьеву · Тропарь, глас 5
На ка́мени благоче́стия утверди́вся,/ па́стырь ре́вностный яви́лся еси́,/ преподобному́чениче Маври́кие сла́вне./ Моли́твою и посто́м, я́ко мече́м обоюдоо́стрым, вооружи́вся,/ вра́жеския наве́ты препобеди́л еси́,/ о слу́жбе церко́вней да́же во у́зах раде́я,/ тя́жкия му́ки и са́мую смерть за Христа́ во смире́нии прия́л еси́,/ и на по́двиг Васи́лия сострада́льца твоего́ укрепи́л еси́./ Те́мже ны́не моли́ся/ благода́ть Свята́го Ду́ха нам стяжа́ти// и Ца́рствия Небе́снаго дости́гнути.
Преподобномученику Маврикию (Полетаеву) и мученику Василию Кондратьеву · Кондак, глас 1
Благослове́ние Кроншта́дтскаго па́стыря Иоа́нна исполня́я,/ путь служе́ния Це́ркви и лю́дем избра́л еси́,/ о во́инех же земны́х попече́ние име́я,/ сам во́ин Христо́в добропобе́дный яви́лся еси́/ и, а́нгельскаго жития́ взыску́я,/ под сень преподо́бнаго Се́ргия устреми́лся еси́,/ иде́же служе́ния во хра́ме Всех святы́х сподо́бился еси́,/ преподобному́чениче Маври́кие./ Во дни же гоне́ний на Це́рковь Ру́сскую,/ вку́пе с му́чеником Васи́лием да́же до сме́рти пострада́л еси́./ И ны́не со все́ми святы́ми Тро́ицу Живонача́льную прославля́я,/ моли́ спасти́ся душа́м на́шим.